Даволі громка на гэтым тыдні прагучалі заявы дзвюх прыкметных у нашых суседзяў асоб — лідараў украінскіх радыкалаў “Правы сектар” Дзмітрыя Яраша і расійскага гурта “Машына часу” Андрэя Макарэвіча. Яны, кожны на свой капыл, вырашылі паспытаць цярпенне ўкраінскай і расійскай улады і грамадскасці. Прадстаўнік баявога крыла кіеўскага Майдана Яраш запатрабаваў у прэзідэнта Украіны Пятра Парашэнкі навесці парадак у праваахоўных органах краіны, каб “звольніць адыёзных прадстаўнікоў антыўкраінскіх сілаў з пасад у Міністэрстве унутраных спраў і распачаць расследаванне іх злачыннай дзейнасці”. У адваротным выпадку ён абяцаў зняць сваіх паплечнікаў “з усходняга фронту і арганізаваць ваенны марш на Кіеў”. Праўда, пазней Яраш змяніў лютасць на міласць і заявіў аб тым, што “узброенага выступлення не будзе”, паколькі ўрад выконвае яго патрабаванні.
Адзначыўся на ўсходзе Украіны і Андрэй Макарэвіч, вядомы антыкрымскай пазіцыяй, якога занадта схільны да справядлівасці дэпутат Яўген Фёдараў прапанаваў пазбавіць званняў і ордэна “За заслугі перад Айчынай IV ступені”, дадаўшы, што “у заканадаўства трэба ўнесці папраўкі, каб пазбавіць чалавека, які здрадзіў радзіме, дзяржузнагарод”. Абараняючыся, Макарэвіч парыраваў, што не ладзіў канцэрт у Славянску перад украінскімі сілавікамі, а проста ездзіў у Святагорскі манастыр, дзе спяваў для дзяцей-бежанцаў з Данецка і Луганска, паводле запрашэння Фонду валанцёраў Украіны. Без сумніву, фанаты “Машыны часу” пасля гэтай парламенцкай ініцыятывы шанаваць свайго куміра менш не стануць.
Між тым добрая навіна прыйшла з Кіева: украінскі бок з 19 жніўня адмяніў пошліны на ўвоз некаторых груп беларускіх тавараў ва Украіну, а Беларусь ліквідавала ліцэнзаванне імпарту ўкраінскіх тавараў. Такім чынам былі зняты існуючыя знешнегандлёвыя абмежаванні. Цяпер мытнікі на мяжы маюць устаноўкі і цыркуляры аб вяртанні нашых краін у зону свабоднага гандлю.
Так і жывём. Убачымся...
Ігар Савосценка,
галоўны рэдактар
sav@sb.by